Pwovèb Chapitre 30
Haitian Contemporary Version
1
Men pawòl Agou, pitit Jake, moun peyi Masa. Men deklarasyon nonm lan te fè: Mwen bouke, Bondye! Mwen bouke, Bondye! Mwen pa kapab ankò!
2
Mwen sòt pase panyen pèse. Mwen pa gen lespri tankou tout moun.
3
Mwen pa janm konnen sa ki rele konesans. Mwen pa konprann anyen nan bagay Bondye.
4
Ki moun ki janm moute nan syèl, apre sa ki redesann sou latè? Ki moun ki janm ranmase van yo nan men l? Ki moun ki janm mare dlo yo nan rad li? Ki moun ki fikse limit tè a? Ki jan li rele? Ki jan pitit li rele? Di m non, si ou konnen?
5
Bondye toujou kenbe pawòl li. Li pwoteje tout moun ki mete konfyans yo nan li.
6
Pa fè l di sa li pa di. Si ou fè sa, l'a fè ou repwòch, l'a fè tout moun wè se mantò ou ye.
7
Bondye, se de bagay ase mwen mande ou: Tanpri, pa refize m yo anvan mwen mouri.
8
Men yo: Pa kite m bay manti pou m twonpe moun. Pa fè m ni rich ni pòv. Ban m kantite manje mwen bezwen pou m viv la.
9
Si mwen gen twòp, m'a vire do ba ou, m'a di mwen pa konnen ki moun ou ye. Si mwen pa gen ase, m'a vòlò, m'a fè yo pase ou nan betiz.
10
Pa janm pale yon domestik mal devan mèt li. L'a madichonnen ou, l'a fè ou peye bouch ou.
11
Gen yon kalite moun k'ap bay papa yo madichon, ki pa gen konsiderasyon pou manman yo.
12
Gen yon ras moun ki konnen yo san defo. Epoutan, pi mal pase yo, nanpwen.
13
Gen yon lòt kalite moun ankò ki mete nan tèt yo yo pa kanmarad pèsonn, wa pa kouzen yo.
14
Gen yon lòt kalite moun, se bèt nan bwa yo ye. Pou yo viv, y'ap devore malere yo, y'ap pwofite sou pòv yo.
15
Sansi gen de pitit fi: tou de gen menm non, yo rele: Ban mwen! Ban mwen! Gen twa bagay ki pa janm di ase. Sa m'ap di la a! Gen kat bagay ki pa janm di se kont.
16
Men yo: Se peyi kote mò yo ye a, se fanm ki pa ka fè pitit, se tè a ki pa janm bwè kont dlo li, epi se dife. Bagay sa yo pa janm di ase.
17
Yon pitit ki pase papa l nan betiz, ki pa respekte lòd manman l, chen gen pou devore kadav li nan raje, zwazo nan bwa va manje grenn je li.
18
Gen twa bagay mwen pa janm ka konprann. Sa m'ap di la a! Gen kat bagay konsa.
19
Men yo: e chemen malfini lè l'ap plannen nan syèl. Se chemen koulèv lè l'ap mache sou wòch. Se chemen batiman lè l'ap kouri sou lanmè. Se chemen gason pou li rive pran fi.
20
Men ki jan fanm k'ap twonpe mari yo fè: Lè yo fin fè sa y'ap fè a, yo benyen byen pwòp, epi yo di: Mwen pa fè anyen ki mal.
21
Gen twa bagay ki fè latè tranble. Sa m'ap di la a! Gen kat bagay moun pa ka sipòte.
22
Men yo: Se esklav ki rive chèf. Se moun sòt ki jwenn tout sa li bezwen.
23
Se fanm ki pa jwenn gason renmen l', epi ki rive mare yon nòs. Se sèvant ki rive ranplase mètrès li.
24
Gen kat bèt sou latè ki pi piti pase tout bèt. Men w'a gen lespri pa ou, se pa pase yo:
Références croisées
Job 12:7
25
Se fwomi: yo tou fèb, men yo pase tout sezon chalè ap fè pwovizyon mete la.
Références croisées
Pr 6:6-8
26
Se chat mawon: yo pa pi fò pase sa, men yo fè kay yo nan twou wòch.
27
Se krikèt vèt: yo pa gen chèf, men yo mache pa bann.
28
Se zandolit: ou ka pran yo nan men ou, men ou jwenn yo nan palè wa yo.
29
Gen twa bagay ki bèl lè y'ap mache. Sa m'ap di la a! Gen kat bagay ki gen bèl demach:
30
Se lyon, se li ki pi fò nan tout zannimo, li pa pè yo yonn.
31
Se bouk kabrit. Se chwal sele bride. Se wa lè y'ap mache devan lame yo.
32
Si ou te sòt jouk pou ou te rive fè grandizè, kalkile sou sa ou fè a: Pe bouch ou!
33
Si ou bat lèt, l'ap fè bè. Si ou frape yon moun sou men l, l'ap senyen. Si ou nan pouse dife, ou nan gwo kont.
Référencé par 12
Références croisées: OpenBible.info · CC BY 4.0
Verset du Jour
"Ta parole est une lampe à mes pieds, et une lumière sur mon sentier."
— Psaume 119:105
Voir le verset complet →Sauvegardez vos versets, rejoignez votre congrégation
S'inscrire gratuitement arrow_forward