Zakari Chapit 6
Haitian Contemporary Version
1 Mwen fè yon lòt vizyon ankò, mwen leve je m gade. Mwen wè kat cha lagè ki t'ap sòti nan fant de mòn fèt an kwiv.
2 Premye cha a te gen chwal wouj ki t'ap rale l. Dezyèm cha a te gen chwal nwa ki t'ap rale l.
3 Twazyèm cha a te gen chwal blan ki t'ap rale l. Katriyèm cha a te gen chwal takte wouj ki t'ap rale l.
4 Mwen pran lapawòl, mwen mande zanj ki t'ap pale avè m lan: — Sa sa yo ye, mèt?
5 Zanj lan reponn mwen: — Se kat van ki fenk sòti devan Mèt tout latè a.
6 Cha chwal nwa yo t'ap rale a pran direksyon peyi ki sou bò nò a. Cha chwal blan yo t'ap rale a pran menm direksyon an. Cha chwal takte wouj yo t'ap rale a pran direksyon peyi ki sou bò sid la.
7 Lè chwal takte wouj yo parèt, yo t'ap pyafe, yo pat ka tann ankò pou y'al toupatou sou latè. Zanj lan di yo: — Ale toupatou sou latè! Yo kouri ale toupatou sou latè.
8 Lèfini, zanj lan rele m, li di m konsa: — Chwal ou wè ki pran direksyon peyi ki sou bò nò a fè kòlè Senyè a tonbe.
9 Senyè a pale avè m ankò. Li di m konsa:
10 — W'a pran ofrann moun ki sòti nan peyi kote yo te depòte yo a: Eldayi, Tobija ak Jedaya. W'a ale lakay Jozyas, pitit gason Sofoni an, ki fenk rive sòti lavil Babilòn.
11 W'a pran ajan ak lò yo te ba ou yo, w'a fè yon kouwòn, w'a mete l sou tèt Jozye, pitit gason Jozadak la, granprèt la.
12 Lèfini, w'a pale avè l, w'a di l: Men sa Senyè a di: Men moun yo rele Boujon an. Li pral pouse kote li ye a. Li pral rebati kay ki apa pou Senyè a.
13 Se li menm ki pral rebati kay ki apa pou Senyè a. Yo pral konsidere l tankou yon wa. Li pral chita sou fòtèy la pou l gouvènen pèp mwen an. Va gen yon prèt bò kote l. Y'a travay ansanm ak kè poze.
14 Kouwòn lan menm va rete nan kay ki apa pou Senyè a. L'a sèvi pou fè moun toujou chonje Eldayi, Tobija, Jedaja ak Jozyas, pitit gason Sofoni an.
15 Moun ki rete byen lwen va vini, y'a ede nou rebati Tanp Senyè a. Lè sa a, n'a konnen se Senyè ki gen tout pouvwa a ki te voye m kote nou. Se sa menm ki va rive si nou fè tou sa Senyè a, Bondye nou an, ban nou lòd fè.
Antretan
"Pawòl ou a tankou yon lanp k ap klere chemen m, yon limyè k ap klere devan m."
— Sòm 119:105
Sove vèsè ou yo, rantre nan kongregasyon ou a
Enskri Gratis arrow_forward