Eklezyas 11

Haitian Contemporary Version

¹ Fè byen san gad dèyè. Yon lè konsa, w'a jwenn rekonpans ou.

² Separe sa ou genyen ak mezi moun ou kapab, paske ou pa janm konnen ki malè ki ka rive ou sou latè.

³ Depi nyaj yo plen dlo, se pou lapli tonbe sou latè. Lè yon pyebwa tonbe, kit li tonbe sou bò nò, kit li tonbe sou bò sid, kote l tonbe a, se la pou li rete.

⁴ Si w'ap gade sou van, ou p'ap janm plante. Si w'ap gade sou nyaj, ou p'ap janm ranmase rekòt.

⁵ Menm jan ou pa konnen ni kote van an sòti ni kote li prale, menm jan an tou ou pa konnen ki jan zo timoun fè fòmen nan vant fanm ansent. Se konsa tou ou pa ka konprann travay Bondye, li menm ki fè tout bagay.

⁶ Nan maten, plante jaden ou. Aswè rive, plante jaden ou ankò. Ou pa janm konnen kilès nan de yo ap bay plis rannman. Ou pa janm konnen si tou de p'ap pran, si tou de p'ap bay menm rannman.

⁷ Ala bon bagay se fè klè! Sa bon nèt lè ou wè solèy.

⁸ Si yon moun gen chans viv lontan sou latè, se pou li kontan pou tout tan sa a. Men li pa dwe janm bliye tan li pral pase lè li fin mouri a long anpil. Tan anvan yo pa vo anyen devan tan k'ap vini yo.

⁹ Nou menm, jenn gason, pwofite jennès nou. Fè kè nou kontan pandan tout tan nou jenn gason toujou. Fè tou sa nou ta vle fè, tou sa nou anvi fè. Men pa bliye Bondye gen pou mande nou kont pou tou sa nou fè.