2 Kwonik 3

Haitian Contemporary Version

¹ Salomon tanmen bati Tanp Senyè a lavil Jerizalèm sou mòn Morija a, kote Senyè a te parèt devan David, papa l, sou anplasman David te pare pou sa a, ki vle di kote Onan, moun Jebis la, te gen glasi l la.

² Lè sa a, Salomon te gen twazan yon mwa de jou depi li te wa.

³ Salomon te bati Tanp lan sou yon fondasyon ki te gen katrevendis pye longè sou trant pye lajè.

⁴ Gwo pyès ki te devan Tanp lan te gen trant pye lajè menm jan ak Tanp lan, ak sankatreven (180) pye wotè. Salomon te fè kouvri tout miray anndan pyès la ak bon lò.

⁵ Li plake planch bwapen sou tout anndan gwo pyès la. Li kouvri tout bwa yo nèt ak bon lò. Lèfini, li fè yo mete pòtre pye palmis ak ti chenn.

⁶ Li dekore l ak bèl pyè koute chè. Yo te sèvi ak bon kalite lò ki sòti peyi Pavayim.

⁷ Li kouvri tout anndan Tanp lan ak lò: travès yo, ankadreman pòt yo, palisad yo ak pòt yo menm. Sou tout palisad yo, li fè mete pòtre zanj cheriben.

⁸ Yo bati tou pyès ki apa nèt pou Senyè a. Li te gen trant pye lajè, menm jan ak Tanp lan, ak trant pye longè, kare kare. Yo sèvi ak venmil (20.000) kilo lò pou kouvri tout anndan l.

⁹ Klou yo te sèvi yo te fèt ak lò tou. Chak klou te peze senksan gram. Yo kouvri tout miray anndan pyès anwo yo tou ak lò.

¹⁰ Nan pyès ki apa nèt pou Senyè a, li fè fè de estati zanj cheriben. Li fè kouvri yo ak lò nèt.

¹¹ Yo te mete zanj yo kanpe yonn bò kote lòt, ak figi yo bay sou pòt antre pyès la. Yo chak te gen de zèl. Chak zèl te gen sèt pye edmi longè. Zèl yo te louvri. Pwent zèl anndan yo touche yonn ak lòt nan mitan pyès la, de pwent zèl deyò yo touche ak de miray sou kote yo. Konsa, longè tout zèl yo ansanm te bay trant pye.