Detewonòm 19

Haitian Contemporary Version

¹ Moyiz di yo ankò: — Lè Senyè a, Bondye nou an, va fin detwi nasyon sa yo pou l ban nou peyi ki te pou yo a, lè n'a fin pran tout peyi a nan men yo pou nou rete nan lavil yo ak nan lakay yo,

² n'a chwazi twa lavil nan peyi Senyè a, Bondye nou an, te ban nou pou nou rete a, n'a mete yo apa.

³ N'a kenbe wout ki mennen nan vil sa yo nan bon eta. N'a divize teritwa Senyè Bondye nou an te ban nou pou nou rete a fè twa zòn ak yon vil nan chak zòn. Konsa, nenpòt moun ki ta rive touye yon lòt ka kouri al kache nan yonn nan vil sa yo pou li sove lavi li.

⁴ Men nan ki sikonstans yon moun ka kouri al kache nan yonn nan lavil sa yo pou sove lavi l: Se lè yon moun touye yon frè parèy li san li pa fè espre, san li pa janm gen anyen avè l.

⁵ Konsa, si de moun al pou koupe bwa, si yonn ladan yo leve rach li epi rach la demanche al frape lòt la touye li frèt, yon nonm konsa gendwa kouri al kache nan yonn nan lavil refij yo pou li sove lavi li.

⁶ Si te gen yon sèl lavil konsa, distans la ta ka twò long. Lè sa a, moun ki reskonsab pou tire revanj moun yo touye a, si l'ap kouri dèyè moun ki te fè krim lan, li ta ka rapousib li. Nan kè cho li, li ta ka ba l yon kou, li touye l. Lè sa a, li ta touye yon inonsan, paske nonm lan pat fè espre, li pat janm gen anyen nan kè l kont moun li touye a.

⁷ Se poutèt sa mwen mande nou pou nou mete twa lavil konsa apa espre pou sa.

⁸ Konsa tou, lè Senyè a, Bondye nou an, va fè peyi nou an vin pi gran jan li te pwomèt zansèt nou yo, lè l'a ban nou tout peyi li te pwomèt l'ap bay zansèt nou yo,

⁹ n'a chwazi twa lòt lavil, n'a mete sou sa nou genyen deja yo. Men, pa bliye, l'ap ban nou peyi a, se pou nou toujou swiv tout lòd m'ap ban nou jòdi a, se pou nou toujou renmen Senyè a Bondye nou an, pou nou swiv chemen li mete devan nou an.

¹⁰ Se konsa, nou p'ap kite yo touye moun ki inonsan nan peyi Senyè a, Bondye nou an, te ban nou pou rele nou pa nou. Si nou kite sa rive, n'a peye pou sa nou fè a.

¹¹ Men, si yon moun rayi yon lòt, epi li pran veye l jouk li tonbe sou li, li ba l kou jouk li touye l, epi apre sa, li kouri al kache nan yonn nan lavil sa yo,

¹² lè sa a, chèf fanmi ki reskonsab lavil kote li rete a va voye chache l epi y'a lage l nan men fanmi pre moun ki mouri a pou yo touye l.

¹³ N'a san pitye pou li, n'a wete moun k'ap mache touye inonsan nan peyi Izrayèl la. Se konsa tout bagay va mache byen pou nou.

¹⁴ Nan peyi Senyè a, Bondye nou an, pral ban nou pou nou rete a, pa janm deplase bòn tè moun pèp Izrayèl parèy nou. Kite yo kote zansèt nou yo te plante yo a.

¹⁵ Depozisyon yon sèl temwen pa kont pou moutre si yon moun fè yon krim, osinon yon bagay mal tout bon nan nenpòt akizasyon yo ta ka fè sou do li. Fòk gen de osinon twa temwen ki pou fè depozisyon kont li pou akizasyon an ka kenbe.

¹⁶ Lè yon fo temwen kanpe pou l akize yon moun pou yon krim li pa fè,

¹⁷ de moun ki nan pwosè yo va prezante ansanm devan lotèl Senyè a, devan prèt yo ak jij yo ki desèvis lè sa a.

¹⁸ Jij yo va egzaminen ka a. Y'a mennen yon bon ankèt jan yo dwe fè l la. Si yo jwenn se manti temwen an ap bay, se akize l'ap akize yon moun pèp Izrayèl parèy li pou yon bagay li pa janm fè,