English
Espanol
Portugues
Francais
Kreyol
Jòb 19
Haitian Contemporary Version
1 Jòb pran lapawòl, li di konsa:
2 — Manyè sispann vire lòlòj mwen non! Manyè sispann kraze kouray mwen ak tout pawòl sa yo?
3 Tout tan n'ap plede joure m, n'ap trennen m nan labou. Nou pa wont jan n'ap malmennen m la a?
4 Menm si mwen ta fè sa m pat dwe fè, ki jan pou sa ta ka fè nou mal?
5 Nou konprann nou pi bon pase m. Nou di se paske mwen antò kifè m'ap pase tray sa a.
6 Nou pa wè se Bondye k'ap manyen ak mwen (k'ap frape m'). Se li ki antòtiye mwen nan pèlen li.
7 Si m-rele anmwe ansasen, pèsonn p'ap reponn. Si m mande jistis, pèsonn p'ap kanpe pou defann mwen.
8 Bondye bare tout chemen devan mwen. M pa ka pase. Li fè m wè tou nwa devan mwen.
9 Li fè yo ban m move non. Li fè m pèdi tout byen m.
10 Li minen m tout jan. M'ap deperi. Li wete tout espwa m. Mwen tankou yon pyebwa yo derasinen.
11 Bondye ankòlè nèt sou mwen. Li konsidere m tankou yon lènmi.
12 Li voye yon bann malè sou mwen yon grenn kou, tankou yon lame k'ap atake m. Yo rive sou mwen san m pa wè sa. Yo sènen m anndan lakay mwen.
13 Bondye fè frè mwen yo renka sou mwen. Zanmi mwen yo kouri pou mwen.
14 Tout fanmi mwen, tout bon zanmi mwen disparèt. Moun mwen te konn resevwa lakay mwen bliye m'.
15 Ata sèvant lakay mwen pa rekonèt mwen. Pou yo, yo pa janm konnen m.
16 Si mwen rele yon domestik, li pa reponn mwen. Mwen te mèt lapriyè nan pye l, li pa okipe m.
17 Madanm mwen pa ka pran sant mwen. Ata pwòp pitit mwen yo pè pwoche bò kote m.
18 Tout timoun ap pase m nan betiz. Si m fè yon ti kanpe, yo pase m nan tenten.
19 Pi bon zanmi m yo ap gade m ak degoutans. Sa m pi renmen yo ap pale sou do m.
20 Mwen tounen zo ak po. Sa ki rete pou m mouri a pa anyen.
21 Nou se zanmi m. Pitye pou mwen! Pitye! Se Bondye menm ki leve men sou mwen.
22 Poukisa pou nou leve dèyè m tou menm jan ak Bondye? Kounyeya, nou pa pèsekite m kont nou?
23 Si sèlman te gen yon moun pou kouche pawòl mwen yo, pou ekri yo sou papye,
24 pou pran biren grave yo sou wòch, mete penti pou mak yo pa janm efase!
25 Pou mwen menm, mwen konnen sa fen. Moun k'ap vin defann mwen an, li vivan. Se li menm k'ap kanpe andènye sou latè pou pale pou mwen.
26 Apre mwen fin mouri, l'ap leve mwen kanpe ankò. Ak pwòp je mwen, m'ap wè Bondye mwen an.
27 Se mwen menm menm k'ap wè l. Se p'ap yon lòt moun! Kè m ap fann,
28 paske n'ap mande ki jan pou n fè m pase mizè ankò? Ki rezon n'ap jwenn nan mwen pou nou atake m?
29 Men, atansyon pou se pa sou nou nepe a tonbe, lè Bondye va sòti pou pini moun ki antò yo. Lè sa a, n'a konnen gen yon moun k'ap jije tout bon.
