Ezekyèl 46

Haitian Contemporary Version

¹ Senyè sèl Mèt la di ankò: — Se pou yo kenbe pòtay bò solèy leve nan ti lakou anndan an fèmen pandan sis jou moun gendwa travay la. Men, y'a louvri l jou repo ak jou fèt lalin nouvèl lan.

² Wa a va sòti nan gwo lakou deyò a, l'a antre nan gwo chanm ki nan bout koridò a, l'a kanpe bò poto pòtay yo. Prèt yo menm va boule ofrann ki pou boule nèt yo. Y'a fè ofrann pou di Bondye mèsi yo. Se la, bò pòtay la, wa a va mete ajenou pou adore Bondye. Apre sa, l'a sòti. Pòtay la va ret louvri jouk aswè.

³ Chak jou repo m yo ak chak fèt lalin nouvèl yo, se pou tout pèp la mete ajenou pou yo adore Senyè a devan pòtay la.

⁴ Chak jou repo m yo se pou wa a ofri sis ti mouton ak yon belye mouton san okenn enfimite, pou yo boule nèt pou Senyè a.

⁵ Avèk chak belye mouton, l'a ofri yon demi mezi grenn jaden. Avèk chak ti mouton, l'a bay sa l'a vle. Pou chak demi mezi grenn, l'a bay twaka yon mezi lwil oliv.

⁶ Pou fèt lalin nouvèl lan, l'a ofri yon jenn towo bèf, sis ti mouton ak yon belye mouton, yo tout san okenn enfimite.

⁷ Pou chak towo bèf ak pou chak belye mouton, l'a ofri yon demi mezi grenn jaden. Pou chak ti mouton, l'a ofri sa li vle. Se pou l ofri twaka (¾) yon mezi lwil oliv pou chak demi mezi grenn li ofri.

⁸ Lè wa a ap antre, se pou l pase nan gwo chanm ki nan bout koridò a. Lè l'ap sòti, se la pou l pase tou.

⁹ Pou nenpòt fèt, lè pèp la ap vin adore Senyè a, moun ki pase nan pòtay nò a pou yo antre va pase nan pòtay sid la pou yo sòti. Moun ki pase nan pòtay sid la pou yo antre va pase nan pòtay nò a pou yo sòti. Pèsonn p'ap gendwa pase sòti kote li te pase antre a. Se pou l pase sòti nan pòtay anfas la.

¹⁰ Wa a va kanpe avèk pèp la, l'a antre ansanm ak yo, l'a sòti ansanm ak yo.

¹¹ Pou jou fèt yo ak pou gwo seremoni yo, y'a ofri yon demi mezi grenn jaden pou chak towo bèf osinon pou chak belye mouton y'ap ofri. Pou chak ti mouton yon moun ap ofri, l'a bay sa l'a vle. Se pou yo bay twaka yon mezi lwil pou chak demi mezi grenn jaden.

¹² Lè wa a ap fè yon ofrann paske li vle fè l bay Senyè a, kit se yon ofrann pou yo boule nèt, kit se yon ofrann pou di Bondye mèsi, y'a louvri pòtay ki bay sou solèy leve nan ti lakou anndan an pou li. Se pou li fè ofrann li menm jan li fè l pou jou repo yo. Men, sòti li sòti, y'a fèmen pòtay la.

¹³ Senyè a di ankò: — Chak maten, se pou yo ofri yon ti mouton ennan san okenn enfimite pou yo boule nèt pou Senyè a. Se pou yo fè ofrann sa a chak jou.

¹⁴ Chak maten, y'a ofri tou senk liv farin frans ak yon boutèy ka lwil oliv y'a melanje ak farin lan. Se konsa pou yo fè ofrann sa yo bay Senyè a. Sa se yon lòd ki la pou toutan, ki p'ap janm chanje.

¹⁵ Chak jou nan maten, san sote yon jou, se pou yo ofri ti mouton an, farin lan ak lwil la pou yo boule nèt pou Senyè a.

¹⁶ Senyè sèl Mèt la bay lòd sa a: — Si wa a fè yonn nan pitit li yo kado yon moso nan tè li a, moso tè sa a ap toujou rete pou pitit la. Se va byen eritaj fanmi li.

¹⁷ Men, si wa a fè yon moun k'ap sèvi l kado yon moso nan tè li a, tè a ap tounen pou wa a ankò lè lanne rejwisans lan va rive. Paske, tè a se pou li. Se sèlman li menm ak pitit li ki ka mèt tè a pou toutan.

¹⁸ Wa a pa gendwa mete okenn moun nan pèp la deyò sou tè yo pou li pran l pou li. Se nan tè ki rele l pa l la pou l pran pou l bay pitit li. Konsa, li p'ap mete pèsonn deyò sou tè yo pou l pran tè a pou li.

¹⁹ Apre sa, nonm lan mennen m devan pòt ki toupre pòtay sid la, nan ti lakou anndan an. Pòt la te bay sou chanm yo mete apa pou prèt Bondye yo, sou bò nò a. Li moutre m yon espas nan fon an, sou bò solèy kouche chanm yo.

²⁰ Epi li di m: — Men kote prèt yo va bouyi vyann bèt yo te touye pou mande Bondye padon osinon pou peye pou peche yo fè yo. Se la tou y'a kwit ofrann farin yo. Konsa, tou sa yo te mete apa pou Bondye p'ap janm sòti nan gwo lakou a kote yo te ka fè malè rive pèp la.